سن الأربعين

د. عمرو حسن الحسني
أستاذ م المخ و الأعصاب-جامعة القاهرة

بوست النهاردة للكبار فقط (+30)..لأنه تحديدا عن ” حي الأربعين”
و لا أقصد به حي الأربعين الذي هو أحد أهم أحياء مدينة السويس الباسلة نسبة إلي المسجد الذي به ضريح” عبدالله الأربعين” الذي يتوسط المدينه

المقال النهاردة عن من وصل الي عمر الاربعين و كان حيا يرزق
و لكن اذا كنت ثلاثينيا و (الثلاثيني بقي منطقة شهيره بالاسماعيليه) فانت أيضا مطلوب منك قراءة هذا البوست

١- “حي الأربعين ” هو الوحيد اللي ربنا اختصه بدعاء في القرآن الكريم له مدلولات كثيرة
(حَتَّى إِذَا بَلَغَ أَشُدَّهُ وَبَلَغَ أَرْبَعِينَ سَنَةً قَالَ رَبِّ أَوْزِعْنِي أَنْ أَشْكُرَ نِعْمَتَكَ الَّتِي أَنْعَمْتَ عَلَيَّ وَعَلَى وَالِدَيَّ وَأَنْ أَعْمَلَ صَالِحًا تَرْضَاهُ وَأَصْلِحْ لِي فِي ذُرِّيَّتِي إِنِّي تُبْتُ إِلَيْكَ وَإِنِّي مِنَ الْمُسْلِمِينَ)

٢- حياتك بعد الأربعين لازم تختلف عما قبلها لأن ده سن إكتمال العقل و البناء و البنيه .. و كل اكتمال بعده نقصان .. فأنت وصلت للذروة بلغة الكورونا و هتبدأ في النزول.. لذلك انتبه

٣- انت بعد الأربعين في الثلث الأخير من عمرك
الرسول صلى الله عليه وسلم قال أعمار أمتي بين الستين و السبعين.. و بالتالي بعد انقضاء ٤٠ سنه انت خلصت التلتين و فاضل التلت يعني اللي جاي مش أد اللي راح.. معقول ..بالسرعه دي اه بالسرعه دي .. أمال انت فاكر ايه حضرتك

٤- زي اللي مسافر من القاهرة للغردقه مثلا بالطياره .. مدة الرحلة عادة ٦٠ دقيقه .. تبقي لسه بتترستق في الكرسي و بتاكل الوجبة السريعه و بتستمتع بالطيران.. تلاقي الكابتن بعد ٤٠ دقيقه بيقول بنستعد للهبوط اربطوا الأحزمة.. هي الدنيا كدة بالضبط ..ساعة زمن

٥- الثلاثيني كذلك لازم يقرأ هذا البوست لأن “بلغ أشده” اللي قبل سن الأربعين فسرها العلماء بأنها سن الثلاثين و هو سن انتصاف العمر
فمتفتكرتش نفسك صغنن و لسة بدري عليك و كده

٦- مطلوب منك ٦ حاجات يا “حي الأربعين ”
– تشكر ربنا علي نعمته عليك
– تشكر ربنا علي نعمته علي والديك و متنسهمش في غمرة انشغالك بالأسرة و الذرية و المال و الأعمال
– تعمل صالحا ترضي به ربك و انت في مرحلة الهبوط التدريجي
-ادعي لأولادك بالصلاح
–تتوب إلي الله .. خلاص مفيش وقت .. انت في الثلث الأخير
-تبقي من المسلمين بجد .. و تسلم عقلك و قلبك و بدنك لله

٧- النتيجه هتلاقيها في الآية اللي بعدها
(أُولَٰئِكَ الَّذِينَ نَتَقَبَّلُ عَنْهُمْ أَحْسَنَ مَا عَمِلُوا وَنَتَجَاوَزُ عَن سَيِّئَاتِهِمْ فِي أَصْحَابِ الْجَنَّةِ ۖ وَعْدَ الصِّدْقِ الَّذِي كَانُوا يُوعَدُونَ)

٨- بحكم تخصصي .. حته مخ و أعصاب كده علي خفيف .. الأبحاث اثبتت أن منطقة الprefrontal cortex اللي هي منطقة الناصية في القرآن و هي المسئولة عن التصرفات و السلوك و الشخصية .. تظل في التطور حتي ما بين سن ٣٠ و ٤٠ سنة .. بخلاف معظم اجزاء المخ اللي بتكون اكتمل نضجها قبل كدة بكتير

٩ – البوست مش دعوة للإحباط و اليأس و العزلة.. كل الانبياء تقريبا عدا سيدنا عيسي و يحيي .. كلفوا بعد الأربعين .. معناها ان “حي الأربعين “ده ممكن يبدأ حياة جديده بتكليفات جديدة و أمل جديد.. لكن خلي دايما في تفكيرك إن الطيارة في مرحلة الهبوط التدريجي.. خلي الآخرة هي همك و شغلك الشاغل

١٠- طبعا مش محتاج أقول إن سن التكليف منذ البلوغ .. عشان الشباب الصغير ميفتكرش انه في إجازة مفتوحه حتي سن الثلاثين .. بالعكس ده انت تلحق نفسك من دلوقتي لأنه من شبّ علي شيء شاب عليه.

إذا كنت من سكان “حي الأربعين ” و لم يسبق لك الدعاء بهذا الدعاء القرآني .. ادع به الآن .. و ربنا يتقبل منا و منكم